恭喜發財！

又到咗農曆新年嘅時候，每年呢段時間，電視都有好多賀年嘅廣告。而其中呢個，筆者相信係播得最長久嘅廣告之一。

呢個都可算係香港廣告史上，演員使用授權(Artist Royalty) 上最大嘅烏龍(可能連影像使用權都係，不過可能當時嗰位藝人同客戶/廣告公司/製作公司關係十分之好，唔想咁計較都唔定)。一般情況下，演員合約嘅授權由半年到2年不等，而API 甚至會高達5年或以上(不過有好多藝人同演員都開始唔肯簽咁長)。而上面呢個廣告，無論係普通版同賀年版，都已經跨越咗世代，簡直係陪住筆者成長。

有人話，電視將會喺下一個世代完全被電話/平板/電腦所取代(但筆者覺得唔會)，唔知呢個廣告到時會唔會有新嘅形式出現呢？ 既然呢個廣告已經恭喜大家發財咁多年，最後筆者就唔重覆，淨係恭祝大家新年快樂，身體健康，不過最緊要"人人有Job做，個個有工開！"