攝影師要唔要跟TC?

之前有新入行嘅朋友仔問我，點解有時做Color Grading 時，都見唔到攝影師出現嘅？佢以前讀書時，Tutor 明明有講：攝影師係要去跟TC (Color Grading 嘅簡稱) 架喎！除咗以一句"讀書同做野點同呢！"答佢之外，其實仲有好多原因，以下就逐一分析：

1. 撞期派

第一種原因係攝影師太忙，分身不下，所以黎唔到。

2. 尷尬派

第二種原因係好多時Color Grading 嘅時候，都有太多人參與，例如導演（有時候製片同副導演都會到）；然後Agency 會有Art Base 同埋Account Servicing 嘅同事，如果客戶都黎嘅話，有時甚至Agency 高層都會黎出席下添。而客戶嗰邊如果緊張條片嘅話，都會派人出席。所以好多時攝影師為咗怕太多人，有時都會寧願避席。

3. 無癮派

又正正因為第二種情況，好多攝影師就算拍完條片想喺Color Grading 時就住光暗/顏色/氣氛上俾意見，好多時都俾其他Party 主導咗，搞搞下結果都係得個睇字，有時甚至俾一啲保守嘅客戶搞禍咗佢用心嘅拍攝添。試過有客戶將一位攝影師拍完嘅素材黑位推光、光位整黑；結果同攝影師嘅原意完全相反，結果亦令畫面極之唔協調。

4. 放心派

亦有好多攝影師覺得導演同Agency 以及調色師專業之餘而且眼光獨到，作品經佢地手一定會錦上添花。所以亦都放心，由得佢地自由發揮。

5. 新手派

仲有一種情況，就係新手攝影師唔知道自己可以去參與Color Grading，製片又習慣咗以上情況，所以唔再約攝影師參與。

不過，無論係邊種原因，其實攝影師都可以用另一種形式參與，就係可以send color reference 俾導演，筆者亦遇過唔少攝影師有咁嘅做法，始終拍片對好多攝影師黎講，除咗搵食之外，仲係一種滿足感嘅追求。

以前仲係拍菲林嘅年代，有一位喺亞洲已經好紅嘅香港攝影師，幾乎每次"貓頭鷹時段"嘅one light，佢都會出現。我問佢：你已經咁紅，點解仲要黎睇呢？佢答我，睇one light 除咗可以調一個reference 嘅顏色俾導演之後有得參考外，仲可以喺啲footage 睇番仲有咩位可以改善，e.g. Camera movement，lighting 呀咁。呢番話令我印象極之深刻。

大家又有咩意見呢？不妨同我地分享下！